गजल ६८

म त धेरै तिमीलाई माया गर्ने मान्छे
पर्‍यो भने प्राण दिई आफु मर्ने मान्छे।।

सुख हुँदा मात्र  साथ रोजाई हैन मेरो
दु:ख पर्दा तिम्रो सारा पीर हर्ने मान्छे।।

जीवनको उकाली र ओरालीमा हिड्दा
चोट लागे  मलम् बनी घाऊ भर्ने मान्छे।।

तिमी चढे शिखरमा सफलता चुम्दै
त्यही खुशीमा रमाएर तल झर्ने मान्छे।।

जहाँ जाऊ साथै हुन्छु तिम्रै वरिपरी
आफु फुली तिमीलाई सुवास् छर्ने मान्छे।।

गजल

[पुरा गरौं त साथीहरु...]

छैन पीर देश आज छिया छिया हुँदा खेरी
किन रुन्न तिम्रो मन मातृभूमी रुँदा खेरी !

जताततै  बिष्फोट र बारुदका गोला हानी
कस्तो खुशी ! आफन्तले आँशुले मुख धुँदा खेरी !

जाँदै थिए बस चढी पड्क्यो बम बस भित्र
कठै ! आमा त्यहीं लडीन् छोरालाई छुँदाखेरी।।

पशु बली नदेउ मलाई भन्छिन् दुर्गे माता

यो मेरो पुरानो कविता हो, तर अहिले पनि उत्तिकै सान्दर्भिक लागेकोले पुन: यहाँहरु समक्ष प्रस्तुत गरेकी छु, बाँकी हजुरहरुको प्रतिक्रियाको आशामा। यहाँहरु सबैलाई बिजया दशमी को हार्दिक मंगलमय शुभकामना!!!

अक्षता र फूल-पाती यति भए पुग्छ
मनमा श्रध्दा विश्वास राखी आइदिए हुन्छ
सन्तान र आमाको हो तिम्रो मेरो नाता
पशुबली नदेउ मलाई भन्छिन् दुर्गे माता।

माया जस्तो ठूलो कुरा के छ अरु दिने
सोच्नुहुन्न कहिलेपनि अरुको प्राण लिने
सबैको म संरक्षक हुँ छैन अर्को नाता
पशु बली नदेउ  मलाई भन्छिन् दुर्गे माता।

निरीह ती पशुपंक्षी काटमार गरी
के को खुशी हुन्थे म र, मरीतुल्य सरी
आफ्नै सन्तान लडेका ती हेरुँ कताकता
पशु बली नदेउ मलाई भन्छिन् दुर्गे माता।

सक्छौ भने माया देउ बाँच्ने आधार देउ
सक्दैन ऊ बोल्न केही मनको कुरा बुझिदेउ
उसँग नि तिमी जस्तै बराबरी नाता
पशु बली नदेउ मलाई भन्छिन् दुर्गे माता।

कहिल्यै पनि मागिन है बली देउ भनी
तर किन बसिरह्यो कुसंस्कार बनी
तिम्रो रगत पिएपछि के रह्यो र नाता
पशु बली नदेउ  मलाई भन्छिन् दुर्गे माता।

हत्या हिंसा त्यागे मात्र स्वस्थ्य समाज बन्छ
माया प्रेम बाड्न सके शान्ति घरमै आउँछ
भाइचाराको नातालाई फैलाऔँ आजैबाट
अभियान शुरु गरौं पहिले आफैबाट।

आशिर्वाद दिने मेरो तिमीसँग नाता
पशु बली नदेउ मलाइ भन्छिन् दुर्गे माता
सन्तान र आमाको हो तिम्रो मेरो नाता
पशु बली नदेउ मलाई भन्छिन दुर्गे माता।

ज्यान लिने कुःकर्ममा लाग्दिन म भनी
गरौं प्रण आजैदेखि सुध्रिन्छु म भनी
शुभकामना सबैलाई यही मेरो पनि
भवानीले बनाउन् सबलाई सद्‌वुद्धिका धनी।

सबैलाई विजया दशमीको हार्दिक मंगलमय शुभकामना!!

गजल

लौ त नेता अब चाहीं चुनाबमा जुट्नुहोस्
खल्ती रित्तो भयो होला सबैसंग लुट्नुहोस्।।

झुट्टा आश्वासन भरी पर्चा अनि प्रचारको
बिरोध भए कतैबाट गुण्डा ल्याई चुट्नुहोस्।।

जनताको मन जित्न सकिएन जस्तो लागे
केही छैन बन्दुकले सके जति भुट्नुहोस्।।

सिधा साधा जनतालाई अझै पनि झुक्याउन
भए जति गल्तीलाई भषणले खुट्नुहोस्।।

चुनाब नै बिथोल्दिने कुनै नयाँ खेल भए
मैदानमा उत्रिएर खेल खेल्न नछुट्नुहोस्।।

गजल ६७

भरी थियो तिम्रो माया खाली भयो आज
हिजो सम्म मिठो बोली गाली भयो आज।।

सातै जुनी संगै हौंला भन्थ्यौ कुनै दिन
एकै जुनी काट्न माया जाली भयो आज।।

के थियो र कसूर भन तिमीलाई बिझ्यो
यति चोखो माया पनि फाली भयो आज।।

इष्ट मित्र सबै भन्थे ढुकुरको जोडी
हेर्दा हेर्दै शत्रुलाई ताली भयो आज।।

आँधीबेरी असिनामा तिमीसंगै झुलें
छोड्यौ साथ लाछिएको डाली भयो आज।।

श्रध्दा सुमन मेरी आमालाई

आज आमाको मुख हेर्ने दिन अर्थात आमाको विषेश सम्मान गर्ने दिन। मेरी आमा मेरो साथमा हुनुहुन्न तर उहाँले दिनुभएको माया र उहाँको संझना मेरो ह्रदयमा ताजै छ। आजको यो पवित्र दिनमा मेरी स्वर्गवासी आमामा समर्पित यो श्रध्दा सुमन: र ममताकी खानी संपूर्ण आमाहरुलाई हार्दिक मंगलमय शुभकामना!!!

हे मेरी आमा कहाँ छौ तिमी आउँछ झझल्को
बिर्सन कैले सक्थें र आमा याद छ पल पलको।।

न छाड्यौ कर्म संझेर धर्म कर्तब्य भुलिनौ
गरिनौ आशा कहिल्यै पनि पाउने फलको।।

देख्दथे सधै हँसिलो मुहार कर्ममा जुटेको
संझन्थ्यौ उर्जा सन्तानलाई त्यो तिम्रो बलको।।

हेरेर फोटो चढाएँ फूल श्रध्दाले तिमीलाई
जलधारा दिएँ अंजुली भरी पवित्र जलको।।

जहाँ छौ तिमी पाउने छ्यौ शान्ति गर्दछु कामना
अर्पण गरें यो श्रध्दा सुमन पृथ्वी तलको।।

तिमी र म

तिम्रो जीवनको ‘म’ र मेरो जीवनको ‘तिमी’
हाम्रो प्राप्तिसँगैको अनुभुति
जीवनका भोगाईसँगै गरेका अनगिन्ति यात्राहरु
कति सहज भए, कति असहज
कति मिठा भए, कति तीता
तर पनि पथप्रदर्शक बनेका छन् हरेक पलहरु।

तिमी उस्तै म उस्तै तर पनि फरक
उही ठाउँ उही परिवेश तर पनि बेग्लै
समयको अन्तरालसँगै आएको यो परिवर्तनले
तिमी र मलाई अझ परिपक्व पारेको छ,
तिमीले मलाई र मैले तिमीलाई दिएका
वाचा वन्धन खुकुलिदै गएपनि
तिमीले मलाई हेर्ने र मैले तिमीलाई हेर्ने
दृष्टिकोण उस्तै छ।

कहिले तिमीले भनेका र मैले सुनेका
कहिले मैले भनेका र तिमीले सुनेका
विगतका अनेकौं जीवनगाथाहरु र मनका व्यथाहरु
साटासाट गर्दाको क्षण,
कहिले भविष्यको सपना बुन्दै तिमी र म रमाएका दिन
कति सहज बने, कति असहज बने
कति पुरा भए, कति बाँकी छन्
तर पनि जीवन पूर्ण भएको छ
तिम्रो र मेरो माया गाडा भएको छ।