गजल ६४

आजकल मनमा यस्तै यस्तै कुरा खेल्छ, अनि यसैलाई गजल बनाएँ र हजुरहरु सामु पुर्‍याएँ। प्रतिक्रिया दिने जिम्मा हजुरहरुको।

गर्नु गर्‍यौ नेता हेर मन अति खिन्न भो
मरे पनि तिमीलाई अब भोट दिन्न भो।।।

आशा थियो यो देशको फेरिनेछ मुहार
गल्ती भयो सकिएन तिमीलाई चिन्न भो।।

याद राख सधैभरी यस्तै कहाँ हुन्छ र?
सक्ने छैनौ यसै गरी फेरी भोट किन्न भो।।

रहेनछ खुबी तिम्रो फुर्ती मात्र देखायौ
त्यसैले त यो देशको अंङ्ग छिन्न भिन्न भो।।

गर्नु गर्‍यौ मोज मस्ती ढुकुटी नै रित्याई
अब छैन भरोशा र आशा पनि लिन्न भो।।

गजल ६३

न्यानो अभिवादन, संपूर्ण साहित्यिक मनहरूलाई। यो गजल लिएर यहाँहरु सामु उपस्थित भएको छु यहाँहरुको सुझाबको प्रतिक्षामा।

तिम्रा सबै यादहरु लेखें मैले गजलमा
यो मनको बह सबै मेटेँ मैले गजलमा।।

निको हुन नसकेर बल्झिएका घाउसंगै
दुखेका ती पीडाहरु सेकें मैले गजलमा।।

भिजी रहे परेली यी तिम्रो साथ छाडेपछी
आँशु पुछिदिने साथी भेटें मैले गजलमा।।

जीन्दगीले आफ्नो बाटो अनायासै मोडेपछी
‍आफ्ना कुरा बाँड्ने ठाउँ देखेँ मैले गजलमा।।

जति  थियो बाँकी खुशी बटुलेर अंजुलीमा
आइपर्ने बाधाहरु छेकें मैले गजलमा।।

गजल ६२

खै त नेता अझैपनि सहमति गरेनौ।
कति प्यारो रैछ कुर्सी तल झर्दै झरेनौ।।

कठैबरा राम सर दिक्क भ ए अबत
बाँदर पो रैछौ क्यारे मान्छे जात परेनौ।

पाप लाग्ला तिमीलाई आमालाई रुवायौ
गर्नु गर्‍यौ मोज चाहीं देशको दु:ख हरेनौ।।

तिमी जस्ता लाछी नेता यो धर्तीमा जन्मियौ
या त गर्भै तुहिनुथ्यो या जन्मदै मरेनौ।।

जन्म लियौ मनुष्यको बानी पशु सरी भो
नरकमै बस्ने भयौ भवसागर त्यो तरेनौ।।

गजल ६१

मेरो छेउ आए पछी फर्किएर गयौ
आऊ बस भन्दा भन्दै तर्किएर गयौ।।

के मा चित्त बुझेन र बहकियौ तिमी
राम्रै कुरा गर्दा पनि झर्किएर गयेौ।।

तिम्रो इच्छा मेरो साथ छोड्नु पर्ने भए
त्यो पनि लौ भन्दै थिएँ जर्किएर गयौ।।

के भनौं म तिमीलाई न बुझ्ने त छैनौ
शीशा जस्तै किन आफै चर्किएर गयो।।

उमङ्गले यो जीवन रंगाउँदै थिएँ
ब्यर्थै दिल भित्र बिष छर्किएर गयौ।।

गजल ६०

भन्दिन म तिमीलाई माया गर मलाई
त्यो पनि म भन्दिन भो देउ भर मलाइ।।

एक्लै आएँ एक्लै जान्छु सक्छु एक्लै जिउन
तिम्रो साथ नभएनि छैन डर मलाई।।

शान्ति भए रमाउँछु झुपडीमै बसेनि
चाहिंदैन आलिसान ठूलो घर मलाई।।

दिल भित्र राखेकै हो निस्किएर गयौ त
तिमीसंगै बस्न अब छैन कर मलाई।।

आफ्नै मान्छे संझे मैले तर रैछौ पराई
अरुलाई वर राखी सार्‍यौ पर मलाई।।

दाजुको संझना: कविता

मेरा श्रध्देय दाजु स्व. श्री हिरेन्द्र राज पन्तमा समर्पित:

बिर्सिन्न कैले त्यो साथ तिम्रो याद छ पलपलको
देख्दिन कतै कहाँ छौ कुन्नी आउँछ झझ‍ल्को।।

हे मेरा दाजु आउँदैनौ भेटन किन हो मलाई
हेरेर बाटो म कति बसुँ  यो मन जलाई।।

ढकमक फूल्यो सयपत्री संगै गुर्दौली ंमखमली
देखेर फूल  संझन्छु तिम्रो मुहार झल्झली।।

रहेनौ साथ यस्तै हो भनी यो मन  बुझाएँ
हेरेर फोटो यो श्रद्धा सुमन तिमीलाई चढाएँ।।

गजल ५९: दशैको बेला

२०६९ सालको विजया दशमीको सुखद उपलक्षमा संपूर्ण साहित्यक मनहरुलाई हार्दिक मंगलमय शुभकामना सहित यो गजल:

प्रसन्न रहोस् सबैको मन दशैको बेला यो
निरोगी बनोस् सबैको तन दशैको बेला यो।।

हटेर जाओस मनको मैलो प्रेमको भावले
मिलेर बसुन नेपाली जन दशैको बेला यो।।

संकट हटोस् यो देश बाट चाहना यही हो
नभए शान्ति के होला भन दशैको बेला यो।।

जमरा टिका आशिष ठूलो बडाले दिएको
नदुखाउ मन चाहिन्न धन दशैंको बेला यो।।

थाप्नु है आशिष बाँडेर खुशी आफन्त जुटेर
नगर  दंगा सहनशील बन दशैको बेला यो।।